Зәйдә Россия анимациясе көнен билгеләп үттеләр

8 апрельдә кызыклы дата – Россия анимациясе көне билгеләнә. Ул мультфильм яратучыларны һәм аларның иҗатчыларын берләштерүне күздә тота. Үзәк балалар китапханәсе бу истәлекле көнне биредәге иҗат төркеме тарафыннан төшерелгән мультфильмны тәкъдир итү белән билгеләде. Ул “Чал тарихлы кала» дип атала һәм Зәй тарихына багышлана. Чарада 2 нче мәктәпнең 5 «А» сыйныф укучылары катнашты. Алар безнең көнгәчә сакланган риваятьләргә нигезләнеп Зәй шәһәренең барлыкка килү тарихын карадылар. Крестьян, сәнәкчеләр восстаниеләре, гражданнар сугышы турында мәгълүмат һәм Зәй аҗдаһасына багышланган мифик хикәя ишеттеләр.Соңыннан мастер-класста аны пластилиннан әвәләп ясадылар. Шөгыльне мультфильмны ясауда катнашкан балалар үткәрде. Һәр төркем үзе әвәләгән аҗдаһаны кызыклы итеп тәкъдим итте. Фикерләү сәләтен үстерү өчен оештыручылар балаларга күбрәк китап укырга киңәш бирделәр. Чөнки китап уку фантазияне эшкә җигәргә ярдәм итә, образлы уйлый белергә өйрәтә.