Зәй мәшгульлек үзәгендә эшсез гражданнар белән мәгълүмати очрашу узды

6 нчы апрельдән Зәй шәһәре мәшгульлек үзәгендә эшсез гражданнар белән «Эш эзләүнең интернет-технологияләре» дигән темага мәгълүмати очрашулар циклы башланды. Беренче очрашуда мәшгульлек үзәге белгечләре консультация үткәрделәр һәм мәшгульлек турындагы законнарга аңлатма бирделәр. Гражданнар теркәлү тәртибе, эшсезлек буенча пособие билгеләү һәм түләү тәртибе, шулай ук «Россия эше» порталының мөмкинлекләре һәм социаль контрактны рәсмиләштерү мөмкинлеге белән таныштылар. Эшсез гражданнарга хезмәт базары торышы, мәшгульлек үзәге юнәлеше буенча һөнәри белем алу мөмкинлеге турында сөйләделәр. Чара барышында катнашучылар үзләрен кызыксындырган барлык сорауларга җаваплар алдылар. Алга таба әлеге мәгълүмати очрашулар атна саен үткәреләчәк.