"Карга боткасы" бәйрәме

«Карга боткасы» татар халкының борынгыдан килгән бәйрәме. Исеме үк әйтеп тора, бу бәйрәмне кошларның туган якка әйләнеп кайту хөрмәтенә үткәргәннәр. Ботка пешерү өчен бала-чага өйдән- өйгә йөреп йомырка, төрле ярмалар, май җыйган. Ботка табигать кочагында пешерелгән. Әлбәттә, бәйрәм өлкәннәр ярдәменнән башка үтмәгән. Ботка пешкән арада бала-чага төрле кызыклы уеннар уйнап, җырлап-биеп күңел ачкан. Ботка дүрт өлешкә бүленгән: бер өлеше Җир-Ана хөрмәтенә, бер өлеше һава һәм кояш хөрмәтенә, бер өлеше кошлар хөрмәтенә һәм зур өлеше балаларга бүленгән. Александ Бистәсе мәктәбе укучылары “Карга боткасы” бәйрәмен билгеләп үттеләр. Укучылар шау-гөр килеп, төрле кызыклы уеннар уйнап, бәйрәм хөрмәтенә пешерелгән ботка һәм коймак белән сыйландылар. Кошларны, Җир-Ананы, һава белән кояшны да онытмадылар, аларга да өлеш чыгардылар. Киләсе җәйләребез уңышлы булсын!