Зәйлеләрне «SOTKA» белем бирү программасына кушылырга чакыралар

Һәр елны язын һәм көзен «SOTKA» бушлай укыту-тренировка программасы эшләтеп җибәрелә. Соңгы берничә елда әлеге программада дөньяның 78 иленнән, төгәлрәк итеп әйткәндә, 1649 шәһәрдән 700 000 ләп кеше катнашкан. Бу - физик активлык һәм сәламәт яшәү рәвеше өлкәсендә база белемнәренә өйрәтү аша тормышны трансформацияләүгә юнәлдерелгән белем бирү системасы. Шуңа күрә монда сәер челленджлар, баш ватарлык биремнәр, "гуру"дан әзер киңәшләр юк. Аның каравы, организмның ничек көйләнүен, сәламәт, нык һәм матур булу һәм тормыш сыйфатын шактый яхшырту өчен нәрсә эшләргә кирәклеген белү мөмкинлеге бар. Программаны оештыручылар 1000 нән артык чыганактан - мәктәп дәреслекләреннән башлап, әйдәп баручы фәнни журналлардагы яңа басылган язмаларга кадәр - мәгълүмат җыйганнар. Алар мәгълүматларны эшкәртеп, структуралаштырып, 100 көнлек белем бирү курсы рәвешендә тәкъдим итәләр. Соңгы вакытта яңа коронавирус инфекциясе (COVID-19) таралуга бәйле рәвештә, сәламәт яшәү рәвеше алып бару һәм физкультура белән даими шөгыльләнү аеруча актуальләште. РФ сәламәтлек саклау министрлыгы спорт белән шөгыльләнүне яңа афәткә каршы көрәштә профилактиканың төп чараларының берсе дип атады, чөнки көндәлек күнегүләр организмның физик һәм психологик тигезлеген сакларга мөмкинлек бирә, сәламәт яшәү рәвеше организмның инфекциягә каршы торучанлыгын арттырырга ярдәм итә. Гражданнарның сәламәтлеген ныгыту, иммунитетны күтәрү инструментларының берсе - SOTKA программасы, ул бернинди өстәмә җиһазлар сатып алу яки күп кеше җыела торган урыннарга баруны таләп итми (фитнес клублар яки тренажер заллары), әмма шул ук вакытта өйдә яки ишегалдында турникта шөгыльләнгән вакытта күнегүләрдән барлык өстенлекләрне дә алырга мөмкинлек бирә. Программада катнашучылар 100 көн дәвамында һәр яңа көнне күнекмәләр, туклану, үз көнеңне оештыру һәм катнаш темалар турында файдалы мәгълүмат алу белән башлап җибәрәчәкләр, шулай ук зур булмаган күнегүләр комплексларын башкарачаклар. Программаның үзенчәлеге шунда, аның буенча җенесенә, яшенә, физик әзерлек дәрәҗәсенә карамастан, теләсә кем шөгыльләнә ала. Программага http://100.workout.su яки SOTKA мобиль кушымтасы аша керергә мөмкин (App Store һәм Google Play да мөмкин), әлеге программа берничә тапкыр "Көн кушымтасы" дип танылды. SOTKA программасының авторы - Антон Кучумов. Ул - Россиядә Street Workout хәрәкәтенә нигез салучы, аның ярдәмендә урам турникларында һәм борысларда күнегүләр яңадан модага керде, ә бөтен ил буйлап заманча урам воркаут мәйданчыклары пәйда була башлады.