Район башлыгы Разиф Кәримов "Аккорайд Уилз Русс" ҖЧҖендә булды

Бүген район башлыгы Разиф Кәримов «Аккорайд Уилз Руссиа» ҖЧҖендәге эш барашын карады. Аның белән эшлекле визитта район Башкарма комитеты җитәкчесенең икътисади үсеш, сәнәгать, сәүдә һәм эшмәкәрлеккә ярдәм итү буенча урынбасары Р.М. Архипова, Зәй район үзәк хастаханәсенең баш табибы А. М. Фатыйхов, Әлмәт, Зәй, Лениногорск районнарында «Татарстан» кулланучылар хокукларын яклау һәм кеше иминлеге өлкәсендә күзәтчелек федераль хезмәтенең Татарстан Республикасы буенча идарәсе башлыгы урынбасары Р. М. Насыйбуллин катнашты. Очрашуда катнашучылар завод директоры И.С. Жустров белән бергә җитештерү цехларын карадылар, коронавирус инфекциясе таралу мөмкинлеге чорында җитештерү процессын оештыру белән таныштылар, аннары киңәшмәләр залында киләчәккә планнар һәм бурычлар хакында фикер алыштылар. Иван Жустров очрашуда катнашучыларга заводның төп күрсәткечләре, җитештерү күләмнәрен арттыру һәм предприятиенең үсеш перспективалары турында сөйләде. Разиф Галиевич якын киләчәктә җитештерү күрсәткечләрен тагында үстерү өстендә эшләргә кирәклеген әйтте. Шулай ук эш оештырганда Роспотребнадзорның барлык нормаларын һәм таләпләрен үтәү мөһимлеге искәртелде, күмәк иммунитетны формалаштыру өчен коронавирус инфекциясенә каршы вакцинация үткәрү буенча сөйләшү булды.