Зәйдә балалар язучысы Вера Хәмидуллина белән очрашу узды

24 мартта Зәй үзәк балалар китапханәсендә «Балалар китабы атналыгы» кысаларында шагыйрә, тәрҗемәче һәм нәширә Вера Хәмидуллина белән «Барчагызга елмаю һәм җылылык бүләк итәм» дип исемләнгән очрашу узды. Рәсәй һәм Татарстан Республикасы Язучылар берлеге әгъзасы Вера Петровна Яр Чаллы шәһәрендә яши. Ул балалар өчен бик матур шигырьләр яза һәм икетеллелек әдәбиятын үстерүгә зур өлеш кертә, үз хисабына рус һәм татар телләрендә «Современные авторы – детям издано в Казани» сериясендә китаплар чыгара. В.П. Хәмидуллина, укытучы буларак, балалар психологиясен бик яхшы белә, бу аңа сабыйларның дөньяга карашларын, кичерешләрен чагылдыручы шигырьләр иҗат итәргә ярдәм итә. Шуңа күрә шагыйрә балалар белән уртак телне бик тиз тапты һәм аларга төрле әдәби жанрлар турында сөйләде. Ул балалар белән алар дәрәҗәсендә, гадәти булмаган образлар һәм метафоралар кулланып сөйләшә, нәтиҗәдә очрашуда катнашучылар әдәбият дөньясыннан бик күп яңалыклар белделәр. Аралашу бик кызыклы һәм күңелле үтте. Соңыннан Вера Петровна балаларның барысына да автографлы китапларын бүләк итте.