Зәй муниципаль районына эшлекле сәфәр белән Эльмира Зарипова килде

Бүген Татарстан Республикасы Хезмәт, мәшгульлек һәм социаль яклау министры Эльмира Зарипова эш визиты белән Зәй муниципаль районында булды. Эшлекле сәфәр барышында министр гражданнарны шәхсән кабул итте, җирле массакүләм мәгълүмат чараларына интервью бирде. Аннан Эльмира Әмир кызы “Радость” халыкка социаль хезмәт күрсәтү комплекслы үзәгендә булды, социаль хезмәтләрдән файдаланучылар белән аралашты. Министр хәйриячелек хәрәкәтен үстерүгә керткән өлеше өчен “Пульс” волонтерлар отряды рәисе Мария Боровинскихка ТР Хезмәт, мәшгульлек һәм социаль яклау министрлыгы Мактау грамотасын тапшырды. Эльмира Зарипова оешманың матди-техник базасын һәм проект эшчәнлегендә актив катнашуын уңай яктан билгеләп үтте.