Зәй делегациясе халыкара фәнни-гамәли конференциядә катнашты

17 мартта Казан дәүләт аграр университетының агрономия факультетында Агрохимия һәм Туфрак белеме кафедрасының 100 еллыгына һәм Татарстан Республикасы Фәннәр Академиясенең әгъза-корреспонденты, авыл хуҗалыгы фәннәре докторы, профессор Илшат Әхәт улы Гайсинга 80 яшь тулуга багышланган «Заманча шартларда туфракның уңдырышлылыгын яңадан торгызу һәм азык-төлек иминлеге» I Халыкара фәнни-гамәли конференциясе узды. Конференциядә Татарстан Республикасы Дәүләт Советы депутаты Т.Г. Һадиев, Татарстан Республикасы авыл хуҗалыгы һәм азык-төлек министрлыгының игенчелек бүлеге башлыгы И.А. Садыйков, «Әлмәт» агрохимия хезмәте станциясе директоры М.И. Маметов, авыл хуҗалыгы һәм азык-төлек идарәсе башлыгы Ф.Т. Камалиев, районның баш агрономы А.Г. Хәмитова, Бигеш урта мәктәбе директоры И.Г. Зыятдинов, ТатНИИАХПның агрохимия һәм туфрак белеме директоры Е.А. Прищепенко, Казан шәһәре авыл хуҗалыгы химиясе үзәгенең төбәк директоры М.Д. Нигъмәтуллин, К(П)ФУның туфрак белеме кафедрасы мөдире Е.В. Смирнов катнашты. Район авыл хуҗалыгы идарәсе җитәкчесе Ф.Т. Камалиев, юбилярны Зәй районы башлыгы Разиф Гали улы Кәримов исеменнән ихлас күңелдән 80 яшьлек юбилее белән котлады, аңа туган Зәй җирлегендә әзерләнгән татар халкының милли ризыгын- чәк-чәк тапшырды. Илшат Әхәт улы Гайсин-күренекле шәхес, 300 дән артык фәнни хезмәт авторы. Казан авыл хуҗалыгы институтын һәм агрохимия кафедрасы каршындагы аспирантураны тәмамлап, ул өлкән агрохимиктан Казан дәүләт аграр университетының агрохимия һәм туфрак белеме кафедрасы мөдиренә кадәр данлы хезмәт юлы үткән. Илшат Гайсин «туфрак-үсемлек» системасында микробиоген металларны алмаштыру һәм миграция концепциясен эшләүдә катнашты, Татарстан Республикасының көньяк-көнчыгыш нефть чыгару районнарында туфракның уңдырышлылыгын торгызу һәм сулыкларны чистарту проблемасы буенча тикшеренүләр программасы белән җитәкчелек итте. Зәйлеләр үзләренең күренекле якташлары - Илшат Әхәт улы Гайсин казанышлары белән лаеклы горурланалар.