Зәй укучысы-кыллы уен коралларында башкаручылар конкурсының I дәрәҗә лауреаты

1 марттан 14 мартка кадәр «Дуслык» сәламәтләндерү-белем бирү комплексы базасында (Казан) «Скрипкачы һәм виолончельләрдә артистлык формалаштыру» - дип аталган белем бирү программасы узды. Зәй балалар музыка мәктәбенең 5 нче сыйныф укучысы Уразайкина Виктория (укытучысы Кадыйрова Люция Павловна) сайлап алу турын уңышлы узды һәм музыкаль-башкару сәнгате буенча март белем бирү программасында катнашу мөмкинлегенә ия булды. Виолончелистлар төркеме концертмейстеры сыйфатында программага уку-укыту эшләре буенча директор урынбасары, Зәй балалар музыка мәктәбенең югары квалификацияле категорияле укытучы һәм концертмейстеры Светлана Вячеславовна Рыцова чакырылган иде. Программа кысаларында ике атна дәвамында ТР халык артисты, ТР Президенты гранты иясе, И.В.Әүхәдиев исемендәге Казан музыка көллиятенең виолончель классы буенча югары квалификацияле мөгаллиме Люция Николаевна Исмәгыйлова, шулай ук көллиятнең җәмәгатьчелек белән элемтәләр буенча директор урынбасары, Н.Г. Җиһанов исемендәге Казан дәүләт консерваториясенең музыкаль-гамәли технологияләр кафедрасының өлкән укытучысы Татьяна Юрьевна Иванованың мастер - класслары узды. Виктория профильле программаны уңышлы үзләштергән, барлык чараларда да актив катнашкан, шулай ук белем бирү программасында катнашучыларның кыллы уен коралларында уйнаучылар конкурсында чыгыш ясаган һәм анда I дәрәҗә лауреат булган. Виктория һәм аның укытучысын уңышлары белән котлыйбыз, яңа җиңүләр телибез!