Зәйдә инновацион технологияләрне куллану темасына багышланган форум узды

Бүген Зәй шәһәренең 1нче мәктәбендә «Туган тел һәм әдәбият дәресләрендә инновацион технологияләрне куллану - белем бирүнең заманча сыйфатын тәэмин итү шарты» исемле форумы узды. Әлеге чара Түбән Биш мәктәбе белән берлектә рухи-әхлакый кыйммәт, тарихи һәм милли-мәдәни традицияләр нигезендә гармонияле үсеш алган һәм социаль җаваплы шәхес тәрбияләүдә тәҗрибә уртаклашу максаты белән оештырылды. Форум 1нче мәктәп директоры М.Ф. Мөхәммәтхановның кереш сүзе белән башланды һәм салмак кына мәктәп буйлап экскурсиягә күчте. Мәктәп кунаклары, районыбызның татар теле һәм әдәбияты укытучылары, Зәй муниципаль районында белем баскычы тарихы белән таныштылар. Программа буенча үткәрелгән форум эше югары дәрәҗәдә узды. Укучыларны укыту һәм тәрбияләүнең заманча технологиясе буенча үткәрелгән ачык дәресләр, мастер-класслар буенча фикер алышу булды. «Туган тел һәм әдәбият дәресләрендә инновацион технологияләр куллану - белем бирүнең заманча сыйфатын тәэмин итү шарты» исемле доклад белән беренче квалификацион категорияле туган тел һәм әдәбият укытучысы З.С. Габдрахманова чыгыш ясады.