Зәй муниципаль районында Туган як елына старт бирелде

2021 ел Зәй муниципаль районында Туган як елы дип игълан ителде. Татарстанда ул Туган телләр һәм халыклар бердәмлеге елы буларак уза. Бүген “Энергетик” мәдәният сараенда Туган як елын ачу тантанасы үткәрелде. Ул бер төркем күренекле якташларыбыз: драматург, язучы, тарихчы Рабит Батулла, Россиянең атказанган, Татарстанның халык артисты Наил Дунаев, педагогика фәннәре докторы Рафис Шәймәрданов, опера җырчысы, татар дәүләт филармониясе солисты Владимир Васильев, Татарстанның халык артисты Виталий Агапов, Татарстанның атказанган артисты Марат Галимов һәм эстрада җырчысы Светлана Минеева (Ясмин) катнашында халыклар дуслыгына дан җырлау бәйрәме буларак узды. Тантана алдынан район башлыгы Разиф Кәримов, район башкарма комитеты җитәкчесе Эмиль Галиев һәм кайткан кунаклар район мәдәният йорты хезмәткәрләре оештырган төрле милләтләрнең куллану әйберләре һәм милли ризыклар күргәзмәсе белән таныштылар. “Туган тел, туган як – беркайчан да әһәмиятен югалтмый торган кыйммәтләр, һәрбер кешегә үзенең туган җире, туган ягы якын. Безнең бурыч - туган телләрне тагын да үстерү, туган як тарихын өйрәнү мәсьәләләренә яңача якын килү, моның өчен кулдан килгәннең барысын да эшләү. Туган ягыбызны яратыйк, аның гүзәл табигатен саклыйк. Үсеп килүче яшь буынга Зәебез тарихын, аның күренекле шәхесләре турында даими аңлатып торыйк. Туган як елында шәһәр- район үсешенә һәркем лаеклы өлеш кертер дип ышанам”, - диде район башлыгы Разиф Кәримов сәламләү чыгышында. Чарада “Энергетик” мәдәният сарае коллективлары, аерым башкаручылар җыр-бию аша районыбыздагы татарлар, руслар, чувашлар һәм башка милләт вәкилләренең бер гаилә булып, дус-тату яшәвен күрсәтте. Күренекле якташларыбызга кече Ватан традицияләрен саклауга керткән өлешләре өчен район башлыгының рәхмәт хатлары тапшырды.