Зәйлеләр балалар арасында республика шигырь язу бәйгесендә катнашырга чакырыла

“Татарстан – яңа гасыр” иҗтимагый хәрәкәте “Без төрле, әмма без бердәм!” балалар иҗаты республика фестивале кысаларында Туган телләр һәм халыклар бердәмлеге елына багышлап үзенчәлекле бәйге игълан итә. Анда 5-15 яшьлек балалар үз ана телләрендә шигырь иҗат итәргә тиеш. Бәйгегә җибәрелгән шигырьләр жюри тарафыннан өч төрле яшь категориясендә бәяләнә: 5-6, 7-10, 11-15 яшь. Иҗат эшләре туган телгә мәхәббәт, халыклар дуслыгына хөрмәт, туган телләрне һәм халыклар бердәмлеген саклау темаларына багышланган булырга тиеш. Бәйгегә бер катнашучыдан бер генә шигырь кабул ителә, ул 12дән 30 юлга кадәр язылган булырга мөмкин. Шигырьләрнең татар яки рус телләрендә язылуы шарт. Иҗат эшләрен Казан шәһәре Лобачевский урамы 10нчы йорт адресы буенча (индекс 420111) “Татарстан – яңа гасыр” иҗтимагый хәрәкәтенә юлларга кирәк. Шулай ук «Конкурс стихов» тамгасы белән tnvrod @ yandex . ru электрон адресына да җибәрергә була. Бәйгенең беренче этабы турында www. tnvrod. ru сайтыннан укырга була. Икенче этап махсус положение нигезендә бәйгегә катнашырга теләк белдерүчеләрдән анкеталар җыюдан гыйбарәт, ул 31 мартка кадәр бара. Өченче этапта жюри эшләрне бәяли, ул 1-4 апрельгә кадәр үтә. Ә 5 апрельдә җиңүчеләр исемлеге www. tnvrod. ru сайтына эленәчәк. Шигырьләр бәйгесендә җиңгән иҗат эшләре икенче бәйгегә старт бирә. Монда инде иң-иң дип табылган шигырьләрдән көй язучы балалар җырлар чыгара, ә рәсем ясауга оста булган балалар шул шигырьләр эчтәлегенә туры китереп рәсем ясый. Соңыннан әлеге рәсемнәрдән күргәзмәләр оештырыла, җырлар фестивальнең йомгаклау гала концертында башкарыла. Һәр яшь категориясендә беренче өч урын алучы авторлар акчалата бүләкләр алачак.