Зәйдә «Яшьләр» скверын үстерү проекты өстендә эшләү буенча "Heads group" архитекторлар командасы белән очрашу узды
Бүген С.Рафыйков исемендәге Үзәк китапханәдә район җитәкчелеге «Heads group» архитекторлар командасы белән, Зәй шәһәренең Яшьләр скверын үстерү проекты өстендә эшләү буенча очрашты. Очрашуны район башлыгы Р.Г. Кәримов соңгы елларда җәмәгать киңлекләрен төзекләндерү һәм уңайлы шәһәр тирәлеген булдыру буенча башкарылган эшләргә кыскача күзәтү белән башлап җибәрде. Беренче шундый объект Зәй-2дә Зәй елгасы яр буе булды. Бу гаять зур проект ахырына якынлаша. Ул яр буен һәм Мәктәп тавы янындагы территорияләрне торгызуны гына түгел, Зәйнең барлык тарихи үзәген комплекслы яңартуны да күз алдында тота. 2020 елда иҗтимагый киңлекләрне үстерү программасы кысаларында икенче мөһим объект "Энергетик" мәдәният йорты янындагы үзәк мәйдан проекты. Проектның максаты-Нариман, Рафыйков, Энергетиклар, Лобачевский, Крупская, Ленин урамнары чикләрендә территорияне төзекләндерү. 2020 елда 70 млн. сум күләмендә федераль грант акчасына проектның беренче өлеше тормышка ашырылган. Быел Россия Федерациясенең өстәмә чаралары һәм Татарстан Республикасы бюджеты хисабына проектның 2 нче чиратын гамәлгә ашыру планлаштырылган. Хәзерге вакытта «Яшьләр паркы» проекты буенча яңа конкурска әзерлек бара. Очрашу барышында проектның баш архитекторы Владислав Куликовский, проектлаштыру буенча менеджер Кира Богачева проект һәм «Молодежный» скверын уртак проектлау этаплары турында сөйләделәр. Шәһәр Башкарма комитеты җитәкчесе Роберт Садретдинов, «Яшьлек» спорт мәктәбе директоры Ләйсән Бәхтевалиева, мәгариф идарәсе башлыгы Лилия Печина һәм башка җаваплы затлар үз фикерләре белән уртаклаштылар. Нәтиҗә ясап, Разиф Кәримов очрашуда катнашучыларның игътибарын җәмәгать пространствосын төзекләндерү, халык өчен уңайлы һәм куркынычсыз шартлар булдыру кирәклегенә юнәлдерде. Конкурста җиңгән очракта, федераль грантның якынча күләме 70 млн. сум тәшкил итәчәк.