Зәй балалар китапханәсендә Туган телләр һәм халыклар бердәмлеге елына багышланган әдәби сәгать

“Туган телем – изге гөлем”. Бүген үзәк балалар китапханәсендә үткәрелгән әдәби чара республикабызда игълан ителгән Туган телләр һәм халыклар бердәмлеге елына багышланды. Анда Р.Фәрдиев исемендәге татар гимназиясенең 2 “а” сыйныфы укучылары катнашты. Очрашуның максаты татар теленә булган мөнәсәбәтебезне, олы ихтирам хисләрен милли уеннар, шигырьләр һәм җырлар аша белдерүдән гыйбарәт иде. Балалар бик теләп “Тәрҗемәче”, “Түбәтәй” уеннарында катнаштылар. Җәза үтәгәндә зирәк мәкальләр, шигырь - табышмакларны исләренә төшерделәр. Зур кызыксыну белән Зәй тарихына багышланган татарча мультфильм карадылар. Әкиятләрдән өзекләр укыдылар. Чара барышында телебезнең матур, күркәм булуын, аны өйрәнергә, белергә һәм сакларга бурычлы икәнлегебез ассызыкланды. Ул татар халкының гимнына әйләнгән “Туган тел” җыры белән тәмамланды.