Зәйдә «Татар егете – 2021» муниципаль бәйгесе үтте

Бүген Зәйнең Ринат Фәрдиев исемендәге татар гимназиясендә республикада игълан ителгән Туган телләр һәм халыклар бердәмлеге елы, Ватанны саклаучылар көне уңаеннан үзенчәлекле бәйге үткәрелде. Анда шәһәр һәм авыл мәктәпләреннән саф татар телендә аралашучы егетләр сүз байлыгында, талантларын күрсәтүдә, кул эшләренә осталыкта тапкырлыкта көч сынашты. “Егет солтаны-2021” бәйгесе иң элек мәктәпләрдә үткәрелеп, анда иң-иң яхшылары район турына сайлап алынды. Үсеп килүче буынның туган телебезне белеп, аның аһәңле, матур сөйләм телен пропагандалап, менә шулай бәйгеләрдә катнашуы бик куанычлы. Татар телен һәр мәктәпнең әнә шундый асыл егетләре үрнәгендә күрсәтә алу - ул яшүсмерләр арасында аңа мәхәббәт тәрбияләү дигән сүз. Татар егетләре арасындагы бәйге районда беренче мәртәбә оештырылды. Бәйгенең район турында V-XI сыйныфлардан 11 егет катнашты. Шулай ук егетләргә татар шагыйрьләренең шигырьләрен урында ук сәнгатьле уку, телне белү дәрәҗәсен күрсәтү буенча берничә бирем үтәргә туры килде. Боларга өстәп, һәрберсе кул эшләрен дә күрсәттеләр. Бәйге барышында татар гимназиясенең иҗат төркемнәре чыгыш ясады. Уңган егетләребезнең булуы киләчәгебезнең өметле булуы турында сөйли. Бүгенге бәйге моңа ачык дәлил булып тора.