Зәйдә «Завод Техно» ҖЧҖ филиалы хезмәт коллективы җыелышы узды

Бүген район башлыгы Р.Г. Кәримов «Завод ТЕХНО» ҖЧҖ филиалы хезмәт коллективы белән очрашты. Разиф Галиевич җыелучыларны районның 2020 елга төп социаль-икътисади күрсәткечләре белән таныштырды. Үз вакытында күрелгән чаралар нәтиҗәсендә пандемия чорыннан район аз югалтулар белән чыкты. Шулай ук район башлыгы Разиф Кәримов коллективны 2021 елга эш планнары белән таныштырды, шәһәр һәм район башкарма комитетлары яңа җитәкчеләрен Р.Р. Садртдинов һәм Э. Э. Галиевны тәкъдим итте. Аннары завод директоры Мамонтов А.В. 2020 ел нәтиҗәләре буенча чыгыш ясады. Узган елда җитештерелә торган продукция 2% ка арткан, сату планы 102,2% ка үтәлгән, шулай ук җитештерүчәнлек 0,2% ка күбәйгән. Район башлыгы заводның 2021 елга планнары, бигрәк тә атмосфера һавасының зыянлы матдәләрдән зарарлануын киметергә мөмкинлек бирүче экологик проектны уңай бәяләде. Очрашу Зәй үзәк район хастаханәсенең баш табибы Фатыйхов А.М. чыгышы белән тәмамланды, ул вируслы авыруларны, шул исәптән COVID – 19ны профилактикалау турында мәгълүмат бирде.