Зәйдә ветеранны котладылар

28 гыйнвар көнне Югары Шепкә авылында яшәүче Сәфиуллина Зәйнәп Дәүләт кызы үзенең 90 яшьлек юбилеен билгеләп үтте. Юбилярны котларга район башлыгы урынбасары Валерий Акатьев, Югары Шепкә авыл җирлеге башлыгы Лилия Кәмәлиева һәм район мәдәният йорты автоклубы хезмәткәрләре килгән иде. Зәйнәп Дәүләт кызы Сарман районы Морбаш авылында туа. Балачагы һәм яшьлеге бик авыр сугыш елларына туры килә. Зәйнәп апа колхозда, кырчылык һәм терлекчелектә тырышып эшли, тегәргә, чигәргә, бәйләргә бик оста була. Зур хезмәт сөючәнлек, тәвәккәллек һәм үҗәтлеге аркасында югалып калмый, тормышта бик күп нәрсәләргә ирешә. Ире Тәүзип абый балта остасы була, буралар һәм йортлар төзи, алар бергәләп биш бала тәрбияләп үстерәләр. Мондый тырышлык һәм тапкырлык аларның балаларына да күчкән. Бүгенге көндә Зәйнәп апаның 13 оныгы һәм 22 оныкчыгы бар. Ветеранга киләчәктә дә ныклы саулык-сәламәтлек, озын гомер, якыннарының кайгыртуын һәм тирә-юньдәгеләрнең игътибарын тоеп яшәвен телибез.