Онытылмас ветераннар

20 гыйнварда район Башкарма комитетының яшьләр эшләре буенча идарәсе белгечләре Бөек Ватан сугышы ветераны Лыкова Валентина Лукьяновна янында булдылар. Икенче дәрәҗә Ватан сугышы ордены иясе Валентина Лукьяновна Курск сугышында үзәк, аннан 2 нче Белоруссия фронты составында катнаша, бөтен Украина, Белоруссия аша уза, Польшага барып җитә. Валентина Лукьяновна беренче сугышчан чыныгуны Елец шәһәре астында ала. Елец тимер юл ул елларда аеруча зур әһәмияткә ия объект була. Немец авиациясе 20 ай дәвамында ( 1943 елның августына кадәр) бу тимер юлны юкка чыгару максатыннан аңа 3136 очыш ясаган һәм 450 тонна бомба ташлаган. Немецлар шәһәрне бомбага тоткан чакта поездан яралыларны чыгарырга туры килде - дип искә ала ул. Тиздән санитар поезд таркала, Валентина Лыкова башка ротога эләгә һәм анда булачак ире Николайны очрата. 1944 елда демобилизацияләнә һәм 1958 елда ул ире һәм балалары белән Зәйгә кайта. Олыгайса да, Валентина Лыкова тормышны яратудан туктамый, аның тормыш һәм фронт юлы күпләргә үрнәк булып тора. Ветеранның биш баласы, 9 оныгы, 20 оныкчыгы һәм оныгының 1 баласы бар. Бүгенге көндә ул якыннары кайгыртуында яши.