Зәйлеләрне дуңгызларда африка чумасы таралуга юл куймау буенча саклык чаралары күрергә чакыралар

24 декабрьдә Зәй районының Баграж һәм Карамалы аучылык хуҗалыкларында атылган кыргый кабан дуңгызларының 8 биоматериалы үрнәгендә африка дуңгызлар чумасы вирусы ачыкланган. 25 декабрьдә зарарлану чыганагының 3 координаты билгеләнгән, алардан 5 км радиуста районның 9 торак пункты: Дүрт Мунча, Кабан-Бастрык, Түбән Биш, Пусташит, Нератовка, Яңа Пәлчикәү, Карамалы бистәсе, Перцовка һәм Югары Шепкә урнашкан. Гадәттән тыш хәлләр комиссиясенең ашыгыч утырышы үткәрелде, район башлыгы Р.Г. Кәримов күрсәтмәсе белән югары әзерлек режимы кертелде. Район ветеринария берләшмәсе һәм башка җаваплы хезмәтләр тарафыннан Нератовка авылында терлекләрне юк итү буенча чаралар үткәрелде. Хәзерге вакытта район территориясендә мәкерле вирус таралуга юл куймау буенча барлык кирәкле чаралар дәвам итә: кабаннарны табу, азык мәйданчыкларын һәм кыргый хайваннарны ату урыннарын дезинфекцияләү чаралары үткәрү эше көчәйтелде. Атылган кыргый кабаннарның биоматериаллары тикшерү өчен Республика ветеринария лабораториясенә вакытында җибәрелә. ТР Президенты Указы белән район территориясендә дуңгызларны һәм аларны суюдан алынган продуктларны, сәнәгать җитештерүе продукциясеннән тыш, сату тыела. Халыктан дуңгызлар сатып алу, дуңгызларны иркенлектә тоту, промышленность булмаган дуңгызчылык продукциясен күчеру һем тере дуңгызларны чыгару тыела. Районның башка торак пунктларыннан 5 км радиуста африка чумасы вирусы ачыкланган очракка, югалтуларны булдырмас өчен, халыкка дуңгызларын алдан урнаштырып куярга киңәш ителә.