Зәйдә Яңа ел тамашасы узды

Бүген Р. Ш.Фәрдиев паркында «Яңа ел утлары тылсымы»дигән яңа ел тамашасы үтте. Бәйрәмне алып баручы Кыш бабай һәм Кар кызы, «Энергетик» мәдәният йорты коллективлары үзләренең иҗади номерлары белән бәйрәмгә килгән кунакларга бәйрәм кәефе бүләк итте. Узып баручы 2020 елның кабатланмас мизгелләре... Сәхнәгә район башлыгы Разиф Гали улы Кәримов күтәрелә. "2021 елга аяк басканда барлык зәйлеләр һәм кунакларга үтеп баручы ел вакыйгаларын артта калдырып, Яңа елны ышаныч һәм оптимизм белән каршылауларын телим. Яңа 2021 ел барыбыз өчен дә яңа мөмкинлекләр ачсын, яңа вакыйгалар, иң яхшы план һәм башлангычларның тормышка ашуы белән куандырсын. Һәрберебезнең уңышы-туган якның чәчәк атуы нигезе. Сезгә нык сәламәтлек, күңел тынычлыгы, гаилә учагы җылысы, иминлек һәм татулык телим!", - диде Разиф Галиевич үзенең мөрәҗәгатендә. Шулай ук ул барлык тармак хезмәткәрләренә Зәй районы үсешенә керткән көндәлек хезмәтләре өчен рәхмәт белдерде. Аерым рәхмәт сүзләре быел зәйлеләрнең тормышы һәм сәламәтлеге өчен көрәшкән медицина хезмәткәрләре исеменә яңгырады. Район башлыгы чыгышыннан соң концерт төркеме башкаруында «5 минут»дигән финал җыры яңгырады. Яңа ел тамашасы бәйрәм салюты белән тәмамланды. Якынлашып килүче яна ел барчабызга ныклы саулык, шатлык-куанычлар һәм бәхет алып килер . Яңа ел белән, кадерле зәйлеләр!