Зәйдә наркотикларга каршы комиссия утырышы узды

Бүген хакимиятнең зур залында наркотикларга каршы комиссия утырышында яшүсмерләрне наркотиклардан ничек саклау һәм наркотиклар сатуны булдырмау өчен нинди профилактика чаралары күрү турында фикер алыштылар. Утырышны наркотикларга каршы комиссия рәисе урынбасары – Зәй муниципаль районы башлыгы урынбасары В.Г. Акатьев алып барды. Комиссия әгъзалары тарафыннан: наркотик һәм психотроп матдәләрнең, агулы һәм көчле тәэсир итүче матдәләрнең һәм аларның аналогларының законсыз әйләнеше өлкәсендә хокук бозуларны ачыклау эше турында; наркотикларның законсыз әйләнешенә каршы көрәш өлкәсендә Россия Эчке эшләр министрлыгының Зәй районы буенча бүлегенең эш нәтиҗәләрен массакүләм мәгълүмат чараларында яктырту буенча чаралар үткәрү турында мәсьәләләр каралды. Шулай ук комиссия әгъзалары игътибарына Зәй муниципаль районында 2021 елга наркотикларга каршы эш буенча план тәкъдим ителде. Йомгак ясап, Валерий Григорьевич утырышта катнашучыларның игътибарын әлеге теманың аеруча мөһимлегенә юнәлтте, комиссия әгъзаларына профилактик эшне тагын да активлаштырырга чакырды.