Инвалидлар декадасында күркәм чара

Зәй муниципаль районында инвалидлар декадасын үткәрү күркәм традициягә әверелде. Шул уңайдан “Радость” халыкка социаль хезмәт күрсәтү комплекслы үзәге, “Салават күпере”, “Уймак кыз” балалар бакчалары һәм Яшьләр эшләре идарәсе вәкилләре уртак ведомствоара чара - “Мәрхәмәтле йөрәк” хәйрия акциясе оештырдылар. “Салават күпере” балалар бакчасында тәрбияләнүчеләр үз куллары белән ясалган уенчыклар, ә “Уймак кыз” балалар бакчасының "Незабудки" төркеме балалары “Радость” халыкка социаль хезмәт күрсәтү комплекслы үзәгенең гаилә һәм балаларга социаль ярдәм күрсәтү бүлегендә cоциаль хезмәтләр кабул итүче 13 балага канцелярия товарлары җыелмасы тапшырдылар. “Радость” халыкка социаль хезмәт күрсәтү комплекслы үзәгенең гаилә һәм балаларга социаль ярдәм күрсәтү бүлеге белгечләре Яшьләр эшләре идарәсе волонтерлары белән берлектә балалар өчен өйдә мини-котлаулар әзерләделәр һәм сюрпризлар тараттылар. Ишекне ачучы һәр бала кунакка килгән мультипликацион геройларны зур шатлык белән каршы алды. “Үзенчәлекле” балалар тәрбияләүче гаиләләр әлеге чараны оештыручыларга зур рәхмәтләрен белдерделәр.