Район башлыгы шәһәр белем бирү оешмаларында булды

Бүген район башлыгы Разиф Галиевич Кәримов санитар режимның үтәлешен тикшерү һәм укучыларның туклануын оештыруны контрольдә тоту максатыннан, шәһәрнең белем бирү учреждениеләрендә булды. Эшлекле сәфәр барышында ул шәһәр прокуроры Ринат Кәримов, мәгариф идарәсе башлыгы Лилия Печина, Роспотребнадзорның ТР буенча идарәсе территориаль бүлеге башлыгы Ринат Насыйбуллин, район һәм шәһәр Башкарма комитетлары җитәкчеләре Эмиль Галиев, Роберт Садртдинов белән 3, 5, 1-нче номерлы мәктәпләрнең матди-техник базасы, уку бүлмәләре, мәктәп яны территориясе белән танышты. Дәресләрдә район башлыгы укучылар белән аралашу юлы белән үзе дә аларның коронавирус инфекциясенә каршы профилактика чараларын белү-белмәвен һәм үтәвен тикшерде. Разиф Кәримов мәгариф оешмалары җитәкчеләренең игътибарын барлык санитар-эпидемиологик таләпләрне һичшиксез үтәү юлы белән белем бирү процессының иминлеген тәэмин итүгә, шулай ук укучыларны сыйфатлы кайнар ризык белән тәэмин итү кирәклегенә юнәлтте. Мәгариф оешмалары эшчәнлегенең башка актуаль мәсьәләләре дә каралды. Балалар туклануы һәм Роспотребнадзор таләпләрен үтәү буенча җитешсезлекләр ачыкланмады: барлык мәктәп укучылары һәм педагоглар коллективы иртәнге фильтр аша уза, ишектән керүгә кулларын эшкәртә, тәнәфесләрдә сыйныфларның бер-берсе белән очрашуына юл куелмый. Авыру буенча дәрес калдыручы балалар саны кими. Бүген район буенча 327 укучы мәктәпкә килмәгән.