Район башлыгы авыл хуҗалыгында эшнең барышы белән танышты

Бүген район башлыгы Разиф Кәримов районның авыл хуҗалыгы һәм азык-төлек идарәсе белгечләре һәм зооветеринария белгечләре белән берлектә авыл хуҗалыгы формированиеләрен йөреп чыкты. Алар "Нива” ҖЧҖ, Куш-Елга, Дүрт-Мунча, Бура-Киртә авыллары товарлыклы-сөтчелек фермаларында, Карман, Югары Нәлим, Сарсаз-Баграж авылларында таналар үстерү фермаларында булдылар. Аерым игътибар савым сыерларының сөт продуктлылыгын арттыруга бирелде. Район башлыгы тарафыннан терлекчеләр алдына бер сыердан савымны 20 кг.га кадәр җиткерү бурычы куелды. Разиф Кәримов Сарсаз-Баграж (ферма мөдире Журавлев Александр Николаевич) терлекчеләренә тәүлеклек артымны 820-830 гр. га кадәр җиткереп эшләүләре өчен рәхмәт белдерде. Шулай ук бүген һәр сыердан 19 кг сөт савучы Дүрт-Мунча фермасы коллективына (ферма мөдире Захаров Геннадий Васильевич) аерым рәхмәт белдерелде. Район башлыгы берничә крестьян-фермер хуҗалыгында да булды. Биредә район башлыгы тарафыннан терлекләрне ашату һәм карап тоту технологияләрен үтәп, баш санын арттыра барып эшләү бурычы куелды. Федераль һәм республика программаларында катнашучыларга барлык шартнамә йөкләмәләрен төгәл үтәргә тәкъдим ителде. Рәзиф Гали улы авыл хуҗалыгы машиналарын ремонтлау барышы белән «Нива», «Бигеш», «Кадер» бүлекчәләрендә танышты, аннары «Агросила-Сервис» АҖнең 5 нче ремонт цехында булды, анда «Ропа Тигр» маркалы чөгендер җыю комбайннарын һәм «Фенд»тракторларын ремонтлау бара. Катнашучылар «Зәй» агрофирмасының «Кадер», «Бигеш» бүлекчәләрендә ашлык складларының капиталь ремонтын да карадылар.