Район башлыгы Р.Г. Кәримовның Халыклар бердәмлеге көне һәм Татарстан Республикасы Конституциясе көне белән котлавы

Хөрмәтле зәйлеләр! Сезне дәүләт бәйрәмнәре - Халыклар бердәмлеге көне һәм Татарстан Республикасы Конституциясе көне белән котлыйм! Әлеге бәйрәмнәрнең һәркайсы халыклар бердәмлеге, гражданлык җаваплылыгы идеяләре белән сугарылган. Без бәрәкәтле туган республикабыз, аның бай тарихы белән хаклы рәвештә горурланабыз, үзләренең фидакарь хезмәтләре, батырлыклары һәм иҗади казанышлары белән туган җиребезнең бүгенге муллыгына, бөтенлегенә ирешергә мөмкинлек биргән ата-бабаларыбызны хөрмәт итәбез, зурлыйбыз. Зәй муниципаль районында 20дән артык милләт вәкиле яши, төрле диндәге һәм сәяси карашлары төрле булган кешеләр район-шәһәребезнең барлык тармакларында: энергетика, машина төзелеше, социаль өлкә, авыл хуҗалыгында тырыш хезмәт куялар, республикабыз үсешенә үзләреннән зур өлеш кертәләр. Пандемия белән бәйле кыенлыкларга да карамастан, без икътисадның төп юнәлешләре буенча уңай динамикага ия булдык. Агымдагы елда Зәй районы аграрийлары Татарстанда иң югары күрсәткечләргә ирештеләр, районда республика программалары буенча зур эш башкарылды. Сүз дә юк, бу уңышларда һәр зәйленең өлеше бар, казанышларның нигезендә халкыбызның намуслы хезмәте ята. Куйган хезмәтегез, ирешкән уңышларыгыз, үз һөнәрегезгә тугры булганыгыз өчен рәхмәт белдерәм. Хөрмәтле зәйлеләр! Ватаныбыз, туган республикабыз һәм районыбыз белән горурлану хисләре безне тагын да ныграк берләштерсен! Сезгә чиксез бәхет, оптимизм, тормышта ныклык, тынычлык һәм татулык телим!