Зәй делегациясе Татарстан Президентының тантаналы кабул итүендә

Бүген Казанда авыл хуҗалыгы һәм эшкәртү сәнәгате хезмәткәрләре көне уңаеннан Татарстан Республикасы Президенты Рөстәм Миңнехановның тантаналы кабул итүе узды. Һөнәри бәйрәмнәре алдыннан республиканың алдынгы игенчеләрен, терлекчеләрне, механизаторларны, крестьян-фермер хуҗалыклары башлыкларын һәм авыл хуҗалыгы тармагы белгечләрен хөрмәтләделәр, ә иң яхшыларына Россия һәм Татарстан дәүләт бүләкләре тапшырылды. Тантанага чакырылучылар арасында район башлыгы Разиф Кәримов җитәкчелегендә 18 кешедән торган Зәй делегациясе дә бар иде. Делегация составында авыл хуҗалыгы һәм азык-төлек идарәсе башлыгы Фәргать Камалиев, «Таң», «Аксар», «Баграж», «Сәвәләй», «Чыбыклы» җитештерү комплекслары идарәчеләре, район ветеринария берләшмәсе, «Россельхозцентр» ФДБУ филиалы, Зәй элеваторы башлыклары, эшкәртү предприятиеләре директорлары, механизаторлар, район хуҗалыкларының әйдәп баручы агрономнары, баш инженерлары бар иде. Шунысы куанычлы, бүләкләнүчеләр арасында Зәй муниципаль районы вәкиле дә бар. «Зәй шикәре» агрофирмасы тракторчы-машинисты Мерясев Виктор Алексеевич «Татарстан Республикасының атказанган авыл хуҗалыгы механизаторы» исеменә лаек булды. Бүләкне ул Президент Рөстәм Миңнеханов кулыннан алды. Республика амбарларына быел 5 миллион 347 мең тонна ашлык кергән. Бөртекле культураларның уңдырышлылыгы буенча беренче урында - гектардан 48,6 центнер күрсәткеч белән Зәй муниципаль районы, республика уңышына иң зур өлешне Буа, Арча һәм Тәтеш районнары игенчеләре керткән.