«Мин үзем беренче мәктәптән»

Зәй музеенда беренче мәктәпнең 175 еллыгына һәм Укытучылар көненә багышланган «Зәй мәгърифәтчеләре» дип исемләнгән тематик чара узды. Зәйнең 1 нче урта мәктәбе безнең районда үзенең югары квалификацияле педагогик кадрлары һәм чыгарылышлары белән билгеле. 7«а» сыйныфы укучылары белән очрашуга шуларның берсе-Иванова Маргарита Алексеевна килде. Ул 1 нче мәктәптә 30 ел технология укытучысы булып эшләгән, халыкара Укытучы елында исемле йолдыз һәм «Өч миллиард тонна Татарстан нефтен чыгару уңаеннан» ТР медале белән бүләкләнгән. Чара барышында архив фоторәсемнәре күрсәтелде. Балалар узган гасыр мәктәп биналарын күрделәр һәм яңа өч катлы мәктәп төзелеше масштабларын күз алларына китерделәр. Мәктәп җитәкчелеге турында аерым сүз барды, мәктәпне 1971 елда тәмамлаган Константин Чернов видеофильмыннан педагогик состав турында кечкенә генә сюжет күрсәтелде. Чарада дискуссия мәйданчыгы итеп «Педагогика югары уку йортыннан соң кайсы педагог мәктәптә озак вакыт кала? Ул нинди сыйфатларга ия булырга тиеш? Профессиональ яну мөмкинме?" дигән тема сайланган иде. Бер якта-балалар, икенче якта-сыйныф җитәкчесе Мөхәммәдиева Сәрия Муллаян кызы һәм Иванова Маргарита Алексеевна, икесенә-алтмыш ел педагогик стаж. "Укытучы булу авыр, ул балаларны яратырга, яхшы күңелле, сабыр булырга тиеш, балалар да шау-шу куптарырга ярата", - диләр балалар. “Үз эшеңне һәм балаларны яратсаң, укытучы булу җиңел", – дип җавап бирделәр укытучылар. Маргарита Алексеевна балаларга мәктәп чорына һәм тормышыбызның башка мөһим чорларына багышланган гаҗәеп шигырьләрен укыды. Очрашуның истәлеге итеп Маргарита Алексеевнага һәм мәктәп музеена Беренче бөтендөнья сугышында катнашучы якташларыбызга багышланган «Үз исемеңне хәтерлә» китабы бүләк ителде.