Район башлыгы авыл хуҗалыгы ярминкәсендә булды

Бүген Зәй муниципаль районы башлыгы Р.Г. Кәримов үзенең урынбасары, район Советы һәм Башкарма комитетының җаваплы хезмәткәрләре белән бергә «Зәй» агросәнәгать паркы территориясендә оештырылган ярминкәдә булды. Бу сезон башыннан икенче ярминкә һәм ул хәзер атна саен шимбә көннәрендә узачак. Анда эшмәкәрләр, җитештерү предприятиеләре, крестьян-фермер хуҗалыклары, шәхси ярдәмче хуҗалыклар катнаша. Шулай ук авыл җирлекләре үз продукциясе белән палаткаларын куялар, район башлыгы килгәндә Бигеш, Дүрт мунча, Кадер, Югары Пәнәче, Гүлкин һәм Түбән Биш авыл җирлекләре шәхси ярдәмче хуҗалыклары сәүдә итә башлаган иде инде. Ярминкәдә актив катнашучылар арасында фермерлар Карташов Н. В., Игошин А.В., Носов А.М., Ионов В.И. һәм башкалар бар. Ярминкәдә сыер, дуңгыз ите, кош ите, ит ярымфабрикатлары, казылык һәм кондитер әйберләре, сөт продукциясе, яшелчә, үсентеләр, яңа җиләк-җимеш, шикәр комы сатыла, шулай ук тере кош-әтәчләр сатып алырга мөмкин иде. Разиф Галиевич тәкъдим ителгән продукциянең сыйфатына, сәүдә культурасына игътибар итте. Вакытның иртә булуга карамастан, сәүдә тулы куәтенә барды, зәйлеләр үзләре мондый социаль ярминкәләрнең кирәклеген билгеләп үтә. Ике ярминкәдә 900 мең сумлык товар сатылды.