Зәйдә наркотикларга каршы комиссия утырышы узды

Бүген Зәйдә наркотикларга каршы көрәш комиссиясенең чираттагы утырышы булды. Ул район башлыгы Разиф Кәримов рәислегендә үтте. Көн тәртибендә ел саен уздырыла торган “Мәк” профилактик операциясе нәтиҗәләре, наркотиклар, психотроплы һәм көчле тәэсир итә торган матдәләр һәм аларның аналогларының законсыз әйләнешен ачыклау эшчәнлеге торышы, районда наркобәйлелек белән авыручылар, аеруча яшьләр һәм яшүсмерләр арасында мондый авыруларга медицина ярдәме күрсәтү һәм аларны тернәкләндерүнең нәтиҗәлелеге, наркоманияне профилактикалау һәм сәламәт яшәү рәвешен пропагандалау чаралары турында мәсьәләләр тикшерелде. Каралган мәсьәләләр буенча район эчке эшләр бүлеге башлыгы урынбасары Алексей Бортников, район үзәк дәваханәсе психиатр- наркологы Илфат Салихов, физик культура, спорт һәм туризм идарәсе башлыгы Илфат Әшрәпов чыгышлары тыңланды, шулай ук үз фикерләрен шәһәр прокуроры Ринат Кәримов та җиткерде. Утырышны комиссия рәисе Разиф Кәримов йомгаклады.