Зәйнең яшь талантлары- "Созвездие-Йолдызлык" фестивале җиңүчеләре

29 сентябрьдә Казанда Татарстан Республикасы «Созвездие-Йолдызлык» XX ачык яшьләр эстрада сәнгате фестиваленең гала-концерты узды. Бәйрәм кичәсендә гран-при ияләре, фестиваль җиңүчеләре һәм лауреатлары исемнәре игълан ителде, шулай ук мактаулы исемнәр, иң яхшы педагогларга Дәүләт бүләкләре һәм Татарстан Республикасы Президенты Рөстәм Миңнехановның махсус стипендияләре тапшырылды. Быел ТР Президенты патронажы һәм ЮНЕСКО эшләре буенча РФ Комиссиясе эгидасы астында уза торган фестиваль Бөек Ватан сугышында җиңүнең 75 еллыгына, ТАССР төзелүнең 100 еллыгына һәм «Созвездие-Йолдызлык» фестиваль хәрәкәтенең 20 еллыгына багышланган иде. Әлфия Вәлиуллина җитәкчелегендәге «Мирас» вокаль-хореографик ансамбле «Вокал ансамбльләр – кече төркем» номинациясендә I урынны яулады. Аңа кадәр, 11-15 сентябрьдә, фестивальнең зона турларында призлы урыннар алган балалар финал бәйгесендә катнашкан иделәр, нәтиҗәсе 16 сентябрьдә «УНИКС» концертлар залында узган гала-концерт булды. Биредә вокал-соло номинациясендә Александр Шишмагаева – I урынны яулады, «Балачак планетасы» вокаль ансамбле, «Каприз» хореография коллективы, нәфис сүз осталары Герман һәм Эдгар Афанасьевлар, «Азаль» вокаль-хореографик ансамбле – III дәрәҗәле дипломнар белән бүләкләнде.