Зәйлеләр «Урманны саклыйк» табигатьне саклау акциясенә кушылдылар

Бүген Татарстан Республикасында «Яшә, урман!» урманнарны саклау һәм торгызу темасына җәмәгатьчелек игътибарын җәлеп итүгә юнәлдерелгән Бөтенроссия көзге акциясе кысаларында «Урманны саклыйк» табигатьне саклау акциясе үткәрелә. Агачлар утырту Татарстанның барлык районнарында оештырылган һәм аннан Зәй районы да читтә калмады. Зәйлеләр агач утыртуга иртүк чыкты. Иске Зәй яр буе янында 130 чыршы, миләш һәм спирея үсентесе утырттылар. Яшелләндерүдә шәһәр Советы, 1-нче номерлы мәктәп, "Каенкай" балалар бакчасы, район мәдәният йорты, ветеринария берләшмәсе һәм туган якны өйрәнү музее хезмәткәрләре катнашты. Шулай ук зәйлеләр боз сарае, юлүткәргеч, Җиңү Проспекты һәм Октябрь урамы территорияләрендә агачлар утыртуда катнаштылар. 1/19 йорты янында акциядә катнашучыларга район Башкарма комитеты җитәкчесе Илнар Хафизов та кушылды. Биредә мәдәният, Совет һәм Башкарма комитет хезмәткәрләре көче белән 10 чыршы һәм 20 тирәк үсентесе утыртылды. Гомумән алганда, бүген шәһәрнең барлык нокталарында 500 спирея, 100 чыршы, 50 - нарат, 70 - миләш, 100 -каштан үсентесе барлыкка килде. Утырту материалы белән «Зәй урманчылыгы» ДКУ һәм «Урман хуҗалыгы» ДБУ тәэмин итте.