Зәйдә район һәм шәһәр башлыгы сайланды

Бүген Зәйдә дүртенче чакырылыш Зәй шәһәре һәм Зәй муниципаль районы Советларының беренче утырышлары узды. Утырышта катнашучыларны дүртенче чакырылыш муниципаль берәмлекләрнең вәкиллекле органнарына депутатлар сайлау нәтиҗәләре белән шәһәр Советы депутаты В.Г. Акатьев таныштырды. Шулай ук 1нче утырышта Зәй шәһәре башлыгы һәм Зәй муниципаль районы башлыгын сайлау мәсьәләләре каралды. 100% яшерен тавыш бирү юлы белән әлеге вазифага шәһәр һәм районның хәзерге башлыгы Разиф Гали улы Кәримов яңадан сайланды. Зәй шәһәре башлыгы урынбасары итеп Елена Владимировна Недошивина, район башлыгы урынбасары итеп Валерий Григорьевич Акатьев сайланды. Депутатлар каравына шулай ук шәһәр һәм район башкарма комитетлары җитәкчеләре вазыйфаларын биләүгә конкурслар игълан итү һәм әлеге конкурсларны үткәрү тәртибе турындагы нигезләмәләр хакындагы мәсьәләләр дә тәкъдим ителде. Зәй муниципаль районы Контроль-хисап палатасы рәисе итеп Минебаева Саимә Мәхмүт кызы сайланды. Район Советы утырышында мәртәбәле кунаклар: ТР Хөкүмәтеннән куратор Гущин Иван Николаевич, «Сетевая компания» ААҖ генераль директоры, Зәй муниципаль районы Мактаулы гражданы Фәрдиев Илшат Шәех улы, ТР Дәүләт Советы депутаты Нефедов Николай Валерьевич катнашты. Узган чакырылыш депутатлары В.Н. Исрафилова, А.С. Быля, В.М. Михайлова район башлыгының Рәхмәт хаты һәм «Татарстанның 100 еллыгы» истәлек билгесе, Ф.Н. Николаева- ТР Дәүләт Советы Рәисе Рәхмәт хаты һәм «Татарстанның 100 еллыгы» истәлек билгесе белән бүләкләнде.