Зәй районында декрет ялында булган әниләр яңа һөнәр үзләштерделәр

Зәй шәһәре халык мәшгульлеге үзәге юнәлеше буенча 14 декрет ялында булган әниләр «Чәчтараш» программасы буенча бушлай укулар узды. Укыту «Демография» милли проекты кысаларында оештырылган иде. Курслар программасы 2 ай дәвам итте һәм 320 академик сәгать тәшкил итте. Бу вакыт эчендә укучылар чәчләрне буяу һәм җәю техникасы белән таныштылар, төп инструментлар белән эшләү нечкәлекләре турында белделәр. Барлык гамәли күнекмәләр дә модельләрдә эшләнелде. Уку тәмамлангач, барлык тыңлаучылар да йомгаклау аттестациясен уздылар. Уңышлы тапшырганнан соң, яңа мастерлар таныклыклар алдылар. Гөлнара Мухаметова, курсны тәмамлаучы хис-кичерешләре белән уртаклаша: «Демография» проекты кысаларында халык мәшгульлеге үзәгеннән чәчтараш курсларын уздым. Белем алу мөмкинлеге өчен рәхмәт. Дәресләр барышында без чәчтараш эшенең нечкәлекләрен белдек. Алынган белемнәр шунда ук практикада ныгытылды. Дәресләрне искиткеч һәм грамоталы укытучы алып барды".