Зәй районында республика авыл хуҗалыгы семинары узды

2020 елның 23 июлендә беренче тапкыр Зәй районына эш визиты белән Татарстан Республикасы Премьер-министры урынбасары – авыл хуҗалыгы һәм азык-төлек министры Марат Азат улы Җәббаров килде. Министрның эш визиты программасында көзге һәм сабан культуралары кырларын, «Зәй» агросәнәгать паркын, икмәк кабул итү пунктын, шикәр заводын карау һәм урып – җыю эшләрен оештыру, көзге культураларны чәчү, туфракны төп эшкәртү һәм орлык салу мәсьәләләре буенча республика семинар-киңәшмәсендә катнашу булды. Чара "Сәвәләй"дәүләт сорт сынау участогында узды. Программа кысаларында семинарда катнашучылар «Зәй» агрофирмасының тәҗрибә участогында көзге бодай, сидераль пар, арпа һәм шикәр чөгендере басуларын карадылар, анда шикәр чөгендеренең 65 гибрид сортында тәҗрибә алып барыла. Шулай ук «Зәй шикәре»агрофирмасы басуларында булдылар. Зәй муниципаль районы башлыгы Разиф Гали улы Кәримов авыл хуҗалыгы өлкәсендәге эшләрнең торышы белән таныштырды : «авыл халкы көче белән бөртекле техник культуралардан мул уңыш үстерелде. Бүген иң беренче бурыч - үстерелгән уңышны югалтуларсыз җыеп алу. Безнең потенциал бар", - дип билгеләп үтте ул. Татарстан Республикасы Авыл хуҗалыгы һәм азык-төлек министры Марат Азат улы Җәббаров Зәй районы аграрчылары эшчәнлегенә уңай бәя бирде. «Сәвәләй» сортлы сынау участогында 230 га якын перспективалы сорт һәм авыл хуҗалыгы культуралары гибридлары чәчелгән, сортларның сыйфаты, шытымлылык, туфракны эшкәртүнең төрле төрләрендә авыруларга каршы тору, минераль ашламалар кертү һәм үсемлекләрне яклау чараларын куллану мөмкинлеге өйрәнелә.Семинар барышында чарада катнашучылар «Сәвәләй» сорт сынау участогында сынала торган яңа районлаштырылган, перспективалы бөртекле культураларның сортлары һәм чәчүлекләрне биологик эшкәртү препаратлары белән таныштылар. Татарстан Республикасы Авыл хуҗалыгы һәм азык-төлек министры Марат Азат улы Җәббаров Зәй муниципаль районы башлыгы Рәзиф Гали улы Кәримовка чараны сыйфатлы итеп әзерләгәннәре өчен рәхмәт белдерде һәм киләчәктә дә уңышлар теләде.