Зәй муниципаль районы башлыгы Р. Г. Кәримов сәламәтлек саклау өлкәсе хезмәткәрләрен Медицина хезмәткәре көне белән котлады

19 июньдә Зәй район хастаханәсенең актлар залында сәламәтлек саклау өлкәсе хезмәткәрләренең һөнәри бәйрәмнәре уңаеннан тантаналы чара үтте. Халык сәламәтлеген саклау һәм ныгытуда алны - ялны белмичә хезмәт итүчеләрне Зәй муниципаль районы башлыгы Разиф Гали улы Кәримов, район Башкарма комитеты җитәкчесе Илнар Фәнил улы Хафизов, район хастаханәсенең баш табибы Айдар Мөхәммәтнур улы Фатыйхов котлады. "21 июньдә Россиядә илебезнең төп бәйрәмнәреннең берсе - Медицина хезмәткәре көне билгеләп үтелә. Быел бу бәйрәм Россиядә генә түгел, бөтен дөньяда аеруча әһәмиятле. Хөрмәтле медицина хезмәткәрләре, без сезне чын күңелдән хөрмәтлибез, сезнең игелекле, батыр, хезмәтегезгә сокланабыз һәм ихлас күңелдән үзебезнең рәхмәтләребезне җиткерәбез. Районда халыкка сыйфатлы медицина ярдәме күрсәтү һәм авыруларны профилактикалау өчен бөтен кирәкле шартлар тудырылган”-дип билгеләп үтте район башлыгы үзенең чыгышында. Бүгенге тантаналы чарада иң яхшы хезмәткәрләргә истәлекле бүләкләр, Татарстан Республикасы Сәламәтлек саклау министрының, район башлыгының, район Башкарма комитеты җитәкчесенең Мактау грамоталары һәм Рәхмәт хатлары тапшырылды. Ләйлә Вәлиуллина укыган шигырь, Надежда Бурмистрова башкаруындагы музыкаль номер бәйрәмгә тагын да ямь өстәде.