Яңгыр узды, ә кунаклар калды

Бүген “Уймак кыз” балалар бакчасының дежур төркеменә йөрүче балалар янына гадәти булмаган кунаклар килде. “Бу -яңгыр суалчаннары, алар җир астында яшиләр, ә аларны җылы һава вакытында яуган яңгырдан соң гына күреп була. Аларның кунакка йөрергә вакытлары юк, һәрвакытны җир астында эшлиләр, үсемлекләргә бик күп файда китерәләр: агачларга да, куакларга да, үләнгә дә, чәчәкләргә дә”, – дип сөйли тәрбияче Минеева Дилә Гыйльметдин кызы. “Суалчаннар – үсемлекләрнең дуслары, димәк, безнең дә дуслар. Ә менә хәзер алар җир өстенә чыкканнар, чөнки яңгыр явып узды, җир астында су күп. Шуңа күрә алар ял итеп алырга уйладылар, бездә кунакта булырга”. “Иң мөһиме, -ди Дилә Гыйльметдиновна, балаларның башына бөтен җан иясе дә, матурмы ул матур түгелме, яшәргә хокуклы икәнен җиткерү. Суалчаннарны ямьсез диеп алар турында бернәрсә дә белмәүчеләр генә әйтә ала.”