Зәй район газ эксплуатация хезмәте газ җиһазларына техник хезмәт күрсәтү эшен башлады

2020 елда Зәй район газ- эксплуатация хезмәтендә 21 824 абонентка техник хезмәт күрсәтү планлаштырылган. "Ике атна элек ил буенча карантин белән бәйле рәвештә ял көннәре игълан ителгәч, газ хезмәте эше туктатылган иде. Хәзерге вакытта бу эш яңадан башланды. Газ җиһазлары үзеннән-үзе куркыныч түгел, әмма билгеле бер кагыйдә бозулар һәм төзексезлекләр вакытында ул аяныч нәтиҗәләргә китерергә мөмкин. Шуңа бәйле рәвештә Зәй районында һәм шәһәрдә газ җиһазларына техник хезмәт күрсәтүне башларга дигән карар кабул ителде”, - дип сөйли оешма җитәкчесе Владимир Дуболазов. Газ җиһазларына техник хезмәт күрсәтү елына бер тапкыр уздырыла. Газ оешмалары газ кулланучы җиһазларны, газүткәргечне һәм аның ныгытмаларын җентекләп тикшерәләр. Кирәк булганда газ җиһазларын майлау һәм көйләү, чистарту үткәрелә. Шулай ук төтен юллары һәм вентиляция каналларының тарту көчен тикшерәләр. Ел башыннан техник төзек булмаган җиһазлар куллану һәм газ җиһазларын эксплуатацияләү кагыйдәләрен бозу аркасында 31 абонент газ белән тәэмин итүдән өзелгән. Фатир эчендәге газ җиһазларының төп кимчелекләре түбәндәгеләр: фатир эчендәге газүткәргечтәге контроль кранның төзексезлеге, тоташтыргыч шлангның төзексезлеге, вентиляия каналында тарту көче булмау, бинага һава агымы булмау, авария хәлендәге газ плитәләре. Газовиклармы, әллә мошенниклармы? Моны үз фатирыңның бусагасында ук ачыкларга мөмкин. Газ хезмәте хезмәткәрен фатирга керткәнче, аның махсус киеменә игътибар итегез. Ул "Газпром трансгаз Казан" язулы зәңгәр яки соры төстә булырга тиеш. Үзе белән шәхесен раслаучы эш таныклыгы булуы шарт. Пандемия шартларында хезмәткәрнең йөзендә битлек, кулында перчаткалар, үзе белән дезинфекция чаралары булырга тиеш. Әгәр шик туа икән, 04 яки 104 номерына шалтыратырга һәм диспетчердан әлеге хезмәткәрнең чыннан да эштә икәнен белешергә кирәк. Мәгълүмат расланса, газ хезмәте хезмәткәрен фатирга уздырырга була.