Район башлыгы авыл хуҗалыгы бүлекчәләрен йөреп чыкты

10 апрельдә район башлыгы Р.Г. Кәримов авыл хуҗалыгы һәм азык –төлек идарәсе белгечләре белән авыл хуҗалыгы бүлекчәләрен йөреп чыкты. Сәфәр барышында төп игътибар язгы кыр эшләрен оештыруга бирелде. Районның барлык агрофирмалары һәм крестьян-фермер хуҗалыклары иртә культура- арпа чәчүгә керештеләр. «Чыбыклы» һәм «Сәвәләй» җитештерү комплекслары механизаторлары эшне ДМС-12 чәчү комплекслары белән башлады, кырларда шулай ук СЗП-3,6 базасында үзебезнең агрегатлар эшли. Чәчү агрегатлары артыннан тыгызлаучы агрегатлар килә. Быел туфракның өске катламын тыгызларга, структурасын вакларга һәм мәйданны тигезләргә мөмкинлек бирә торган әлеге агротехник алым бик мөһим: яңгыр булмау һәм көчле җил аркасында туфракның тиз кипшерүе күзәтелә. «Восток» агрофирмасының «Нива» җитештерү комплексы кырларында барлык агрегатлар дым каплатуда, чәчүдә, туфрак тыгызлауда эшли. Районның барлык агрофирмаларында да техник культуралар басуларына минераль ашламалар кертү эше оештырылды. Район башлыгы Р.Г. Кәримов механизаторларның оешкан төстә эшләвен билгеләп үтте, шулай ук язгы кыр эшләрен башкару технологиясен һәм срокларын үтәү буенча кайбер киңәшләрен дә бирде.