Ялгыз өлкәннәр үз-үзләрен изоляцияләү режимында игътибарсыз калмый

65 яшьтән узган, даими кеше ярдәменә мохтаҗ өлкәннәр коронавирус авыруы буенча риск төркеменә керүчеләрдән санала. Үз-үзеңне изоляцияләү режимы чорында үз-үзенә хезмәт күрсәтү сәләтен югалткан ялгыз яшәүче өлкән яшьтәге гражданнар аерым ярдәмгә мохтаҗ. “Шатлык” социаль ярдәм үзәге хезмәткәрләре аларга социаль-көнкүреш хезмәтләре күрсәтүдән тыш, көн саен үз карамагындагыларның ризыклары, кирәкле дарулары, беренче чираттагы кирәк-яраклар һәм яңа матбугат чаралары булуын күзәтеп торалар. Ялгыз яшәүче өлкән яшьтәге гражданнарга волонтерлар һәм шәхси эшмәкәрләр дә битараф калмый. "Зәй икмәге" ҖЧҖ директоры Шалафаев Анатолий Аркадьевич беренчеләрдән булып Зәй муниципаль районының социаль яклау бүлегенә социаль хезмәт күрсәтүләрдән файдаланучыларга иганәче азык-төлек җыелмалары бүлеп бирү инициативасы белән мөрәҗәгать итте. 95 ялгыз пенсионер адреслы иганәчелек ярдәме алачак. Бу ярдәм һәм игътибар нәкъ менә хәзерге вакытта бик кыйммәтле. Зәй районы ветераннары һәм пенсионерлары, халыкны социаль яклау бүлеге хезмәткәрләре исеменнән Анатолий Аркадьевичка хәйрия эшенә керткән шәхси өлеше өчен зур рәхмәт белдерәбез. Бу уңай мисал соңгысы булмас дип ышанабыз.