Районда җирлек башлыкларының күчмә утырышлары дәвам итә

Зәйдә авыл җирлекләре башлыкларының күчмә семинар-киңәшмәсен үткәрү матур гадәткә әверелде. Агымдагы елда шундый утырышларның беренчесе район Башкарма комитеты җитәкчесе И.Ф. Хафизов катнашында Түбән Биш авыл җирлегендә үтте. Семинарның практик өлешендә анда катнашучылар Куш-Елга авылының төзекләндерелгән күпере, чишмәсен, Түбән Биш электр подстанциясен карадылар, Бишсубашы авылында Хамис Камалов шәхси хуҗалыгында булып, гаилә фермасы эшчәнлеге белән таныштылар. Түбән Биш урта мәктәбендә сөйләшү укыту-тәрбия мәсьәләләре турында барды. Семинарның пленар өлеше авыл мәдәният йортында үтте. Анда сүз узган ел Түбән Биш җирлеге, җирлекләрдә шәхси һәм крестьян-фермер хуҗалыклары эшчәнлеге, үзара салым җыю барышы, муницпаль милекне рәсмиләштерү, фельдшер-акушерлык пунктлары торышы һәм кадрлар белән тәэмин ителеш турында барды. Семинар эшенә район Башкарма комитеты җитәкчесе И.Ф. Хафизов йөмгак ясады.