"Якшәмбе көнне- ветеран белән"

Бөек Ватан сугышында Җиңүнең 75 еллыгы уңаеннан Татарстан Республикасында өлкән буын кешеләренә игътибарлы мөнәсәбәт һәм алар турында кайгыртуга юнәлдерелгән "Якшәмбе көнне –ветеран белән" социаль проекты эшли. Әлеге проект кысаларында Зәй муниципаль районы "Шатлык" халыкка социаль хезмәт күрсәтү комплекслы үзәгенең өйдә хезмәт күрсәтү бүлеге хезмәткәрләре волонтерлар отрядлары белән берлектә, ветераннарга һәм тыл хезмәтчәннәренә кирәкле ярдәм күрсәтәләр. Түбән Биш урта мәктәбе волонтерлары Бөек Ватан сугышы ветераны Ермолаев Л.Я. янында булдылар, йорт тирәсен кардан чистарттылар. Ветеран балаларга күрсәтелгән ярдәм, игътибар һәм кайгыртучанлык өчен чын күңелдән рәхмәт белдерде. Шыкмай авылының тыл хезмәтчәне Низамова Гәнҗия әбигә дә социаль хезмәткәр һәм укучылар ярдәмгә килде. Алар өй җыештыруда кулдан килгәнчә ярдәм күрсәттеләр. Бу көнне балалар Куш Елга авылында тыл хезмәтчәннәре Закирова Кәримә һәм Садыкова Гөлфәния әбиләрдә дә булдылар. Алар инде өй мәшәкатьләрен үзләре башкара алмый, аларны социаль хезмәткәр карый. Өлкәннәр балаларның килүенә һәм мондый ярдәмгә бик шат. Балалар ишегалдындагы карны чистарттылар, сукмаклар салдылар. -Өлкәннәргә нинди дә булса ярдәм күрсәтә алуыбызга без бик шат. Бүген менә кар чистарттык, бу безнең өчен бер дә авыр түгел, ә өлкәннәр һәрвакыт та авыр физик эш эшли алмый бит, - дип сөйли укучылар. Балаларның ярдәме өлкән яшьтәге гражданнарның кәефен яхшырта, иртәгәсе көнгә ышаныч тудыра, рухи көч бирә. Буыннарның үзара хезмәттәшлеге яшьләрдә мәрхәмәтлек һәм өлкән буынга карата рухи игътибар тәрбияләүгә ярдәм итә.