Зәйдә вакансияләр ярминкәсе узды

Бүген җиде дистәдән артык зәйле халык мәшгульлеге үзәге тарафыннан оештырылган вакансияләр ярминкәсендә катнашты. Ачык вакансияләрне җирле предприятие-оешмалардан кала, Яр Чаллы заводлары да тәкъдим итте. Аерым алганда, “КАМАЗ” гаммәви акционерлык җәмгыяте структурасына кергән заводлар эшче кулларда ихтыяҗ кичерә. Әйтик, металл кою заводында 45 юнәлеш буенча вакансияләр буш. Аларга йөк төягеч машина йөртүчеләр, металл коючылар, электромонтерлар һ.б.кирәк. Шулай ук пресс-рам һәм тимер заводлары да вакансияләр тәкъдим итте. “Зәй икмәге” ҖЧҖнә баш бухгалтер, технолог һәм В, D категорияләре буенча автослесарь-механик кирәк. Ярминкәгә килүчеләр эш бирүчеләрнең вәкилләре белән аралаша, кызыксындырган сорауларын бирә алды. 49 кешегә алга таба эшкә урнашу буенча әңгәмәгә юллама бирелде. Буш эш урыннары буенча мәгълүматны Нефтьчеләр проспекты, 37 б йорты адресы буенча яки 8 (85558)7 15 43 телефоны аша да алырга була.