Зәй районында "КЭС-БАСКЕТ" мәктәп баскетбол лигасы Чемпионатының зона этабы узды

20-21 декабрьдә Зәй муниципаль районында 7 нче урта мәктәп базасында "КЭС-БАСКЕТ" мәктәп баскетбол лигасы Чемпионатының зона этабы узды. Ярышларга Татарстан Республикасының гомуми белем бирү оешмаларыннан 16 команда килгән иде. Бәйрәм кунакларын «Ак Идел» җыр – бию ансамбле һәм «Элегия» бию коллективы сәламләде. Бәйрәмдә мөхтәрәм кунаклардан Зәй муниципаль районы Башкарма комитеты җитәкчесе Илнар Фәнил улы Хафизов, Татарстан Республикасы Мәгариф һәм фән министрлыгының мәктәптән тыш эшләр Республика үзәгенең ГТО комплексын гамәлгә кертү һәм спорт секторы мөдире-Тимур Дамир улы Гаязов, ярышларның баш хөкемдары - I категорияле судья - Терентьев Валерий Константинович, I категорияле судья - Тарасов Владимир Юрьевич бар иде. Сәламләү сүзе белән Илнар Фәнил улы Хафизов чыгыш ясады. Ул ярышларда катнашучыларга кызыклы матчлар, күтәренке кәеф һәм якты җиңүләр теләде. Зәй муниципаль районы командасын уеннарда 7 нче мәктәпнең егетләр командасы һәм Ринат Фәрдиев исемендәге татар гимназиясе кызлар командасы тәкъдим итте. 20 декабрьдә көн дәвамында зона ярышлары финалына чыгу өчен кискен көрәш барды. 21 декабрьдә Зәй, Яр Чаллы, Әгерҗе районнарыннан иң лаеклы 4 кызлар командасы һәм Яр Чаллы, Зәй һәм Мамадыш районнарыннан 4 команда февраль аенда узачак чемпионат финалына чыгу өчен көч сынашты. Киеренке һәм матур көрәш барышында урыннар түбәндәгечә бүленде: кызлар арасында: зона этабында 1 урынны Зәй шәһәре татар гимназиясе кызлар командасы, 2 урынны Яр Чаллы шәһәренең 15 нче урта мәктәбе кызлар командасы яулады һәм 3 урынны Әгерҗе районы кызлар командасы яулады. Егетләр арасында: зона этабында 1 урынны Яр Чаллы шәһәренең 4 нче урта мәктәбе командасы, 2 урынны Зәй шәһәренең 7 нче урта мәктәбе командасы, 3 нче урынны Мамадыш районының 3 нче урта мәктәбе командасы яулады.