Зәй районының авыл мәктәпләрендә һөнәри юнәлеш буенча очрашулар дәвам итә

Авыл мәктәпләре укучылары арасында эшче һөнәрләрне популярлаштыру һәм һөнәри юнәлеш буенча эшне оештыру максатыннан, Зәй шәһәренең халык мәшгульлеге үзәге мобиль офисы Бигеш мәктәбендә булды. Чарада 13 укучы катнашты. 8-9 нчы сыйныф укучылары өчен “Күңеленә хуш килгән һөнәр - бу чынбарлык” дип исемләнгән чара үтте. Профконсультант Ләйсән Баһаветдинова укучылар белән бергә хезмәт фәне буенча һөнәр төрләрен өйрәнделәр. Профконсультант һөнәри юнәлеш буенча тест уздырды, Зәй районының хезмәт базарында нинди һөнәрләргә ихтыяҗ артуы хакында сөйләде. Катнашучылар "Һөнәрне ничек сайларга һәм ялгышмаска» дигән видеофильм карады. Чара ахырында укучыларга актив катнашканнары өчен сувенирлар тапшырылды.