Район башлыгы шәһәрнең берничә учреждениесендә булды

Бүген район башлыгы Разиф Кәримов Зәй шәһәренең берничә предприятиесендә һәм оешмасында булды. Үзенең эш визитын ул «Зәй крекеры» кондитер фабрикасы ҖЧҖнән башлады, анда ул агымдагы эш мизгелләре белән танышты. Зәй политехника көллиятендә Разиф Кәримов уку корпусын, спорт залын, остаханәләрне карап чыкты, укытучылар һәм студентлар белән аралашты, уку йортында үзләштерелгән белгечлекләргә хезмәт базарында ихтыяҗ зур булуын билгеләп үтте. Актлар залында район башлыгына Яңа елга әзерлекне күрсәттеләр. 2 нче урта мәктәптә Разиф Гали улы керү төркемен ремонтлау барышын тикшерде. Ә «Теремкәй» балалар бакчасында 2020 елда капиталь ремонт ясалачак, объект республика программасына кертелгән. Территорияне төзекләндерүгә шулай ук җирле бюджеттан финанс чаралары бүлеп биреләчәк. Район башлыгы капиталь ремонт исемлегенә кертеләчәк эш төрләре белән танышты. Соңгы объект «Шатлык» халыкка социаль хезмәт күрсәтү үзәге булды, биредә быел республика программасы буенча бинаның фасады ремонтланды. Разиф Кәримов башкарылган эшләрнең сыйфатын бәяләде, форсаттан файдаланып, Үзәк хезмәткәрләре аңа грант чаралары хисабына алынган җиһазларны күрсәттеләр.