Зәйдә инвалидлар декадасына старт бирелде

Бүген «Энергетик» мәдәният сараенда инвалидлар декадасы ачылышына багышланган «Игелек көченә ышаныч белән!» бәйрәм концерты булды. Концерт программасын М.Никитина, «Каприз» хореография ансамбле һәм «Магия» хореография төркеме башкаруында «Игелек кыл» вокаль-хореографик композициясе ачты. Халыкара сәламәтлек мөмкинлекләре чикләнгән кешеләр көне 1992 елның 3 декабрендә БМО Генераль Ассамблеясы тарафыннан игълан ителгән. 25 елдан артык ул ярдәмгә мохтаҗ булган, әмма шул ук вакытта һөнәри осталыкта, сынлы, үзешчән сәнгатьтә, спортта талантларын күрсәтүче батыр, нык рухлы кешеләр турында искә төшерә. Тамашачылар алдында сәламләү сүзе белән район башлыгы урынбасары Валерий Григорьевич Акатьев чыгыш ясады. Ул 3 меңнән артык кешене берләштергән район инвалидлар җәмгыятенең эшчәнлеген уңай яктан билгеләп үтте, барысына да сәламәтлек, уңышлар, игелек теләде. Шулай ук иң изге теләкләр белән чарада катнашучыларга Инвалидлар җәмгыяте рәисе Талипов Илдус Котдус улы һәм Сукырлар җәмгыяте рәисе Костюченко Мария Филипповна мөрәҗәгать иттеләр. Бәйрәм кунакларына үзләренең иң яхшы иҗади номерларын «Мирас» халык вокаль-хореография ансамбле, «Улыбка» балалар хореография ансамбле, «Тату гаилә» балалар бакчасында тәрбияләнүчеләр, Татарстан Республикасының атказанган мәдәният хезмәткәре Александр Шамов, «Русская душа» халык вокаль ансамбле, 9 нчы мәктәп укучылары һәм башкалар бүләк итте. Бүген Зәй районында 3000гә якын инвалид һәм 200гә якын мөмкинлекләре чикләнгән бала яши. Декада дәвамында алар өчен шәһәр һәм авыл җирлекләрендә төрле чаралар: спорт ярышлары, акцияләр, концертлар, бүләкләр тапшыру булачак