Район башлыгы Разиф Кәримов яшь табиблар белән очрашты

27 ноябрьдә хакимиятнең утырышлар залында район башлыгы Разиф Кәримов Зәй район үзәк дәваханәсе яшь белгечләре-табиблары белән очрашты. Сөйләшүдә Зәй район үзәк дәваханәсе баш табибы Рим Амеров та катнашты. Соңгы ике елда район үзәк хастаханәсенә 6 яшь белгеч эшкә килгән. Район башлыгының алар белән очрашуы формаль булмаган шартларда узды. Разиф Гали улы үз чыгышында яшь табибларны районның социаль - икътисади күрсәткечләре белән таныштырды, безнең районда озак һәм нәтиҗәле эш алып баруга өметен белдерде. Район башлыгы шулай ук яшь белгечләргә сайлаган һөнәрләрендә билгеле бер уңышларга ирешүләрен теләде. Очрашуда яшь табибларны борчыган торак проблемалары буенча фикер алыштылар. Разиф Кәримов билгеләп үткәнчә, район хакимияте сәламәтлек саклау хезмәткәрләренә уңайлы шартлар тудыру өчен кулдан килгәннең барысын да эшли. Соңгы 3 елда хастаханәнең балалар корпусына, үзәк поликлиника һәм диагностика үзәгенә, яңа шәһәр микрорайонындагы поликлиника филиалына капиталь ремонт ясалды, Иске Зәй микрорайонында табиб амбулаториясе төзелде, ел саен берәр ФАП төзелә. 2019 елда дәүләт-шәхси партнерлык кысаларында амбулатор гемодиализ үзәге ачылды. Якын арада шундый ук шартларда дәүләт һәм хосусый инвестор арасындагы хезмәттәшлек шартларында рентген компьютер томографиясе үзәген ачу планлаштырыла.