Зәйдә капиталь ремонт һәм төзелеш объектларын тикшерделәр

Зәйдә урыннарга чыгып, 2019 елда республика һәм федераль программаларны гамәлгә ашыру кысаларында капиталь ремонт баручы объектларны тикшерделәр. 27 ноябрь көнне район башлыгы Разиф Кәримов, башкарма комитет җитәкчесенең инфраструктура үсеше буенча урынбасары Николай Нифатов белән берлектә, капиталь ремонт объектларын карап чыкты. Әлеге чарада шушы юнәлешкә кураторлык итүче җаваплы белгечләр дә катнашты. Максаты-башкарылучы эшләрнең сыйфатын тикшерү, шулай ук хезмәтне саклау нормаларының һәм куркынычсызлык техникасы үтәлүен контрольдә тоту. Комиссия әгъзалары 7 объектта булдылар. Тикшерү нәтиҗәсендә җитешсезлекләр табылмады, барлык эшләр дә график нигезендә башкарыла.