Зәйдә тантаналы төстә Ана капиталы сертификатын тапшырдылар

Бүген ЗАГС бүлегендә Зәй муниципаль районы башкарма комитеты җитәкчесе Хафизов Илнар Фәнил улы катнашында 11 гаиләгә ана капиталы сертификатын тапшыру тантанасы узды. Өч яшь гаилә үзләренең беренче балалары туу очрагын теркәделәр һәм тантаналы рәвештә сабыйларының туу турында таныклыгын алдылар. Алар адресына Башкарма комитет җитәкчесе исеменнән бик күп җылы сүзләр яңгырады. "Кыңгырау» балалар бакчасында тәрбияләнүчеләр гаиләләрне концерт номерлары белән котладылар. Ана (гаилә) капиталына дәүләт сертификатлары «Балалары булган гаиләләргә дәүләт ярдәменең өстәмә чаралары турында»29.12.2006 ел, №256-ФЗ Федераль законын тормышка ашыру кысаларында Зәй районында һәм Зәй шәһәрендә РФ Пенсия фонды Идарәсе тарафыннан бирелә. 2007 ел башыннан бирле 3 712 сертификат бирелгән. 2019 елда 164 гаилә сертификат алды. Ана (гаилә) капиталы торак шартларын яхшыртуга, балаларга белем бирүгә, ананың булачак пенсиясен арттыруга; айлык түләү алу (түбән керемле гаиләләргә бирелә); инвалид балаларны җәмгыятькә интеграцияләү һәм социаль адаптацияләү өчен билгеләнгән товарлар һәм хезмәт күрсәтүләр сатып алуга юнәлдерелергә мөмкин. Зәй районында ана капиталы акчаларын куллануның төп юнәлеше - торак шартларын яхшырту: ипотеканы өлешчә түләү яки торак сатып алу.