"Табигать һәм иҗат"

Зәй туган якны өйрәнү музеенда Татарстан Республикасы Рәссамнар берлеге әгъзасы, Россия Федерациясе рәссамнар берлеге әгъзасына кандидат, шагыйрь, прозаик Николай Владимирович Карасевның шәхси күргәзмәсе ачылды. Күргәзмәдә агачтан ясалган авторлык эшләнмәләре тәкъдим ителә. Дөнья агачтан башланган дигән халык риваяте бар. Аның кәүсәсе – галәм күчәре, ә агачның күңеле-табышмак. Николай Владимирович бу табышмакның ачкычын тапты-ул корал ярдәмендә агачка икенче тормыш бүләк итә, аны искиткеч картиналарга әйләндерә. Шуңа күрә аның эшләрен ике рәссам-агачны иҗат итүче табигать һәм әлеге агачның матурлыгын күрергә ярдәм итүче автор ясаган дип әйтергә була. Бу картиналарга озаграк караган саен, алардан карашны аеру да кыенрак. Әлбәттә, бу техника түземлек, тырышлык, талант таләп итә. Бу күргәзмәне тиз генә карап булмый, аның эченә үк кереп, авторның серен чишәсе килә. Картина аны караучы булганда яши. Кунаклар зур кызыксыну белән Карасев иҗатының тагын бер ягы – шигърият белән таныштылар, автор башкаруында лирик һәм патриотик шигырьләр тыңладылар. Шигырьләрдән тыш, ул өлкәннәр өчен проза һәм әкиятләр дә яза. Әдәбиятка керткән өлеше өчен шагыйрь мәдәният һәм сәнгать өлкәсендә Шамил Бикчурин исемендәге премия лауреаты булды.